شبكة القانونيين العرب شبكة القانونيين العرب
random

احدث المواضيع

random
جاري التحميل ...

رأسمالية ع الطريقة العراقية


رأسمالية ع الطريقة العراقية

بقلم الحقوقي محمد العبيدي

تخنكني العبرة من من الكى اشخاص يطلعون لاوكرانيا اشجم مرة او لروسيا او لبيروت او لاوستوزلافيا ويخبصوني خبص ع الفيس بصورهم امام واجهات الفنادق ال5 sattars وبالكافيهات والشاليهات بنص البنوات .. وفجاة يدزولي دعوة لحضور الParty مالتهم بمناسبة حصولهم ع الماجستير او الدكتوراه ! مع العلم ولا فد يوم تلمحهم بالمكتبات ولو حتى على سبيل السيلفي , ولا فد يوم تلمح بايديهم كتاب , ولا فد يوم تكعد وياهم ويسولفولك بموضوع علمي ضمن تخصص دراستهم ! ومن تسالهم عن الدوام يكوللك : دراسة عن بعد 

ومن تسولف على صعوبة الدراسات العليا ومشاكل المصادر والترجمة ووووو يهمس واحدهم باذنك :
- استاذ لاتزعل مني ترا اني امون عليك بس انت اشكد قديم ؟ 70 ورقة بجيب البروفيسور اللبناني او الاوكراني او الروسي وهو يتكفل بكول شي 

فجاة تكتشف نفسك ولاول مرة اهبل متعرف شدكول :

- اهااااا يعني هو يكتب لك البحث ! زين والمناقشة شلون ؟

- ثلاثين ورقة لخ بجيبه الثاني , وهو يتكفل بالباقي , انت ماعليك غير تلبس روب المناقشة وتطك صور ويا لجنة المناقشة , وامانة الله امانة الله اش رح تسولف بالمناقشة محد رح يخض ال مي بحلكك .

تشعر حاصرتك الشسمهه فتستاذن وتطب للحمام تكضي لك ساعة تدعي بيها على روح اهل اهل دكتورة زينة غانم العبيدي اللي فاجاتك بمناقشة الماستر مالتك ورفعت شعار ( لو تطلع نخلي بغاسو ما انطينو تقدير اكثغ من 70 ) 
تسولف الفيلم كدام جماعة ف يضحكون حيل :

- استاذ ممعقولة توّك دريت !!! انت تدري لو متدري اكو بعض التدريسيين من المحافظات النازحة الموصل وغير الموصل من النزوح ولحد هسه مفرغين نفسهم تماما لكتابة بحوث ترقية لزملائهم من ( المحافظات المنتخية ).. وكوم التعاونو ما ذلو , وهذا طبيعي لان همه هم محتاجين خدمات بالمقابل ,, كفالة , اقامة , جواز , تسجيل سيارة , تمليك شقة او دار ، ورق .. يورو .. الخ الخ مبيها شي احنا ولد بلد واحد ولازم واحدنا يدعم الثاني هههههه اصلا اكو عدنا واحد تدريسي مديلحك يكتب والناس لازمه عليه سره ( عفوا عن الجافيه )

يتناوشك الثاني مثل جماعة حاصرين واحد ومستلميه كفخ :
- اني من الرمادي وطالب دراسات واغلب جماعتي كملوا بحوثهم بهالطريقة
يكفخك الثالث :

- اشوفك مستغرب استاذ ؟ اني طالب بكالوريوس حقوق بجامعة الامام الصادق الاهلية , كبل يومين طبيت مع صاحبي لمكتب العميد وجان جاي ديتوسط لواحد طالب ( فقير حيل ) بلكت يتساهلون وياه بالدرجات , والظاهر صاحبي جان يمون حيل يمون ع السيد العميد بحيث انه كبل ميكمل سالفته شال العميد التليفون وخابر رئيس القسم وكال له بالحرف الواحد 
- فلان الفلاني .. تضربون درجاته في 2 
ها ولمن سالت صاحبي عن هذا ال ( فقير ) اللي توسط له طلع فد واحد فقير حيل حييل فقير تخصصه السكر وال ك .. استقفر الله
يناوشك الرابع دفره معدلة :
- اني جنت تدريسي بجامعة الحدباء الاهلية بيوم من الايام طب لي رئيس القسم وناوشني قائمة باسماء 9 من اكسل ما خلق الله من الطلبة وكال :

- استاذ بدون زحمة عليك ذولة اريدهم ينجحون
- اسف دكتور ما ممكن لان ذولة من اكسل الطلبة عندي .. والصفر حيل هوايه عليهم , اني ما اكدر انجحهم , واذا مصر انهم ينجحون فتكدر انت تنجحهم بس اني اعتذر

رئيس القسم ولا رد عليا سحب سجل الدرجات من يمي وبدا يغير ويعدل بالدرجات على كيفه
هذا لعبان نفس مو ؟
اكو ناس عدها القدرة انها تستثمر كل الظروف
حتى بالجنازة .. تلكاه دفّان !!

عن الكاتب

رشدي عبد الغني رشدي عبد الغني شبكة قانونية عربية تسعى الى نشر الثقافة القانونية بين الاوساط القانونية والمهتمة بالمجال القانوني
يمكنك زيارة موقع الشبكة عبر الرابط التالي: http://www.law-arab.com/
كما يمكنكم زيارة موقع المكتبة القانونية عبر الوصلة : http://legallibrarybooksresearch.law-arab.com/
نتمنى لكم يوم موفق..

اذا أعجبك الموضوع فلماذا تبخل علينا بالردود المشجعة

التعليقات

ابدأ الآن مجاناً مع برنامج المحامي الذكي تفضل بالدخول من هنا



جميع الحقوق محفوظة

شبكة القانونيين العرب

2016