ماهي ضمانات البائع والمشترى في عقد البيع

محمد أحمد فؤاد - المحامي

ناس كتير بتكون خايفه لما تروح تشترى شقه أو محل أو عقار تمليك وبيكونو خايفين يتنصب عليهم أو يكون الورق فيه حاجه غلط وخصوصا لما بيكون عقد فيه أقساط أو المشترى بيمضى إيصالات امانه ... الموضوع بمنتهى البساطة ...

 أولا لابد لابد لابد من وجود محامى معاك سواء أثناء البيع أو الشراء ... 

إنما لو حكمت الظروف ومافيش معاك حد يبقى خلى بالك من الى حقولهولك كويس اوى اوى اوى ...

 أولا لازم تراجع تسلسل الملكيه كويس اوى .. يعنى ايه ؟؟

 يعنى تشوف الأرض اصلا كانت ملك مين وبعد كده بعها لمين وهكذا وهكذا لحد الراجل إلى حيبعلك وكل ده طبعا بعقود وتاخد صورتها وطبعا لو فى حد متوفى فى تسلسل الملكيه يبقى فى أعلام وراثه وطبعا لازم كمان تاخد صورته ... وأيه كمان ؟ اقولك انك لازم تسأل وتتأكد أن إلى الشقه فى حيازة البائع وهو إلى مسئول عنها وكمان حاول تاخد منه توكيل رسمى عام فى الشهر العقارى بالبيع والشراء للنفس أو الغير ولا يجوز إلغائه إلا بوجود الطرفين ... ركز معايا انا بقول العقد الأول وبعد كده التوكيل علشان ماحدش يقولى طيب انا معايا توكيل وخلاص ... 

لازم العقد وبعد كده زيادة أمان التوكيل وبيتكتب فيه عنوان الشقه بالظبط ... وحاول تبقى مبلغ صغير علشان لو فى عداد مياه أو كهرباء بأسم البائع لازم يروح بشخصه يتنازل عليهم للمشترى الجديد ... 

طيب ولو الشقه عليها أقساط ؟ يبقى تعمل بند فى العقد بتاريخ الاقساط وكل لما تدفع قسط البائع يمضى جمبه بالإستلام ولما تخلص خالص تاخد منه مخالصه بسداد كامل الثمن علشان لو خلصت فلوسك ورفض يعملك عقد نهائى يبقى معاك مايثبت أنك سددت كامل الثمن ... 

نفس الموضوع اوعى تشترى شقه مكتوب فى العقد أنها عليها أقساط من غير ما تتأكد أن البائع دفع كامل الاقساط ... وحاجه كمان اخيره لو البائع بيبعلك بتوكيل مش بعقد حاول تستعلم عليه من الشهر العقارى ولو ماقدرتش يبقى تاخد صورة التوكيل وخلى البائع يكتب إقرار أن التوكيل سارى وصحيح وعلى مسئوليته وان موكله على قيد الحياه حتى تاريخه ويكتب تاريخ اليوم ... وبردو لازم لازم محامى معاك ... ونرحب بالرد علىكافة استفساراتكم القانونيه ....