مقال عن كحول المبانى بقلم المحامي احمد فؤاد

 كتير اوى مش عارف يعنى ايه كحول مبانى وبيسمعو الجمله دى فى اكتر من مكان ... بص ياسيدى الجمله دى بتتقال على الشخص الى بيتكتب أوراق العقار بإسمه علشان طبعا مخالفات المبانى والكوارث إلى بتحصل زى عقار الاسكندرية وغيره يعنى نوع من أنواع التحايل على القانون وده طبعا علشان المقاول أو ملاك العقار الأصليين يحمو نفسهم ويكونو بعيد عن أى مسأله قانونيه ... سواء البناء بدون ترخيص أو الهدم أو استئناف الأعمال وغيرها من مخالفات البناء ... 

علشان كده بنقول خلى بالك وانت بتشترى شقه حاول على قدر الإمكان انك تاخد ضماناتك من صاحب العقار الأصلى أو المقاول الفعلى لأن الكحول ده شخص المفترض انه مالوش مكان ثابت أو معروف علشان طبعا الأحكام إلى بتصدر عليه وخصوصا لأنه ممكن يكون مكتوب بإسمه اكتر من عقار وطبعا ممكن يكون عليه أحكام قضائية كتير وممكن كمان فى اى لحظه يتمسك أو يختفى وطبعا ساعتها حيكون موقفك صعب وخصوصا لو ليك حق أو لو فى اى التزامات لسه ماتنفذتش بالذات لو العقار لسه تحت الانشاء ... خلى بالك من النقطه دى كويس واكشف على تسلسل الملكيه وتأكد منه وراجع كويس مع محاميك وخد ضماناتك على قد ماتقدر واسمع كلام المحامى بتاعك اوى وماتقولش مش مهم الشقه ثمنها كويس او فيها مميزات ومش حعرف اعوضها ومشى البيعه ...

 هو أعلم بمصلحتك لأن ده شغله اسمع كلامه علشان هو يقدر بعد كده يجبلك حقك لو حصل حاجه لاقدر الله ... ونرحب بالرد على كافة استفساراتكم القانونيه