معرفة الإجراءات العملية في الاعلان عن الدعوى - تسليم الاوراق القضائية

بقلم المحامي سامح علان 

طبعا هنبدأ كلامنا على مرحلة الإعلان ودي بتكون بعد مرحلة رفع الدعوى والمنشور القادم عن رفع الدعوي

المهم بعد حضرتك ما بترفع الدعوى بتاعتك أيا كان نوعها بتتقيد في قلم كتاب المحكمة وبتاخد رقم (رقم الدعوى) وطبعا بتستلم أصل الصحيفة وبتكون مختومة بختم المحكمة , بتاخد أصل الصحيفة والصور اللي معاك (حسب العدد) وتروح بيهم على قلم المحضرين (المختص !! خلى بالك هنشرح الكلمة دي) هتروح لقلم المحضرين وتسلمه أصل الصحيفة والصور وهو هيقولك رقم (رقم محضرين) حضرتك مطلوب منك تسجل الرقم دا معاك (على نسخة الصحيفة الخاصة بيك !! هنشرحها بردو) علشان الرقم دا هو اللي هتروح تستلم بيه الصحيفة بتاعتك وغالبا هتروح تسأل عليها بعد أسبوعين من تاريخ التسليم.

طيب .. هتسأل عليها ازاي .. زي ما قولتلك برقم المحضرين اللي انت قيدته عندك (عرفت أهمية الرقم دا)

لما تروح تستلم أصل الصحيفة هتلاقي قصاد كلمة (مخاطبا مع ...) نتيجة الإعلان , يعني هتلاقي مثلا لو المعلن إليه أعلن لشخصه هتلاقي مكتوب (مخاطبا مع / شخصه ) .. طيب إذا كان أعلن إداري (هتلاقي) ختم على العريضة محضر انتقال ومكتوب قدام كلمة (مخاطبا مع / مأمور قسم ...) ,,,, طيب في أحيانا نلاقي نتيجة الإعلان (إجابة) ودي معناها أن المحضر معرفش العنوان اللي انت كاتبه بتاع المعلن إليه ,,,, وفي أحيانا تلاقي مكتوب قدام كلمة (مخاطبا مع / نجله , ..) ودي يعني الاعلان تم في الموطن.

يبقى احنا كدا اتفقنا على ان بنعرف نتيجة الإعلان من الكلام المكتوب قصاد كلمة ايه ..؟!! صح كدا .. (مخاطبا مع ...)

نيجي بقى نشرح حاجات مهمة في الموضوع دا .. زي ايه ؟!!

أولا : يعني ايه قلم المحضرين المختص .. يعني لما حضرتك بتيجي تعلن المعلن إليه في الدعوى بتحدد قلم محضرين المحكمة الجزئية التابع ليه المعلن إليه وتعلن فيه , ولو كان المعلن إليهم (أكتر من شخص) مع تعدد موطنهم يبقى هتروح بالإعلان لكل قلم محضرين تابع ليه كل من المعلن إليه علشان تعلن.

يعني حضرتك ممكن ترفع الدعوى في محكمة وتروح تعلن في محكمة تانية خالص لأن الاختصاص المحلي لرفع الدعوى بيختلف عن اختصاص قلم المحضرين (أحيانا).

ثانيا : لما المحضر يجيبلك إجابة على الإعلان هنا المفروض انه معرفش يوصل لعنوان المدعي عليه فلو أنت متأكد من ان الإعلان صحيح يبقى بتنزل معاه ترشده (إرشاد) , طيب لو العنوان فعلا كنت مش متأكد منه وكان مش صحيح يبقى بتصحح الإعلان وبتعلن تاني.

ثالثا : ايه بقى حكاية (نسخة الصحيفة الخاصة بيك دي !!؟؟ ) المفروض انك لما بتيجي ترفع دعوى بيكون في اصل وعدد صور حسب عدد الخصوم والجدول .. ونسخة ليك انت تحتفظ بيها , وهي دي النسخة اللي حضرتك المفروض تكتب عليها رقم المحضرين.

رابعا : خلصت الإعلان واستلمت أصل الصحيفة معلنة بتروح يوم الجلسة الأولى وتسلمها للمحكمة .. وهنا في المنطقة دي كذا حاجة مهمة .. زي مثلا أن لو كان الإعلان لغير شخص المعلن إليه المحكمة هتأجل لإعادة إعلانه ,,,

 طيب لو كانت الدعوى مستعجلة (قضاء مستعجل) هنا بقى مفيش إعادة إعلان والمحكمة بتنظر الدعوى أيا كان نتيجة الإعلان حتى لو الخصم محضرش ,,, طيب ايه اللي يحصل لو حضرتك محضرتش أول جلسة وقدمت أصل الصحيفة (ولا حاجة .. عادي ولا يهمك !!) كل الموضوع ان المحكمة هتشطب الدعوى بمنتهى البساطة وتضطر تجددها من الشطب وموضوع كبير , كل دا علشان حضرتك محضرتش أول جلسة .. يبقى ايه رأيك بقى .. تحضر وتقدم أصل الصحيفة ولا عادي قشطة والمحكمة تشطب الدعوى علشان حضرتك ماروحتش بدري ومكنتش حافظ يوم الجلسة بتاعك وعارف الرول ومحضر نفسك للدعوى ..

خامسا : طيب اذا كنت انت محامي المدعي عليه وروحت لقيت المدعي لم يحضر , هنا قدامك حلين .. اذا كانت عارف محام المدعي ولاحظت انه مش موجود في القاعة يبقى متدخلش الرول وتسيب الدعوى تتشطب لوحدها , الحل التاني ودا الأفضل انك تحضر في جميع الأحوال ومتتعبش نفسك انك تدور على محام المدعي , وإذا محضرش بعد ما حضرتك دخلت واثبت حضورك يبقى حضرتك بتقول .. الحاضر عن المدعي عليه انسحب تاركا الدعوى للشطب , وممكن لو لقيت ان الدعوى لصالحك تتمسك بالفصل في الدعوى وصدور حكم.